Nunu Guno Miikau Songovian?

Di poguhu, miikau id hisiu tuhun Kadazan. Aiso tikoon. Aiso mija. Songian do otiitimung sabap do kivaa kalaja pitabangan toi' matod toi' kivaa tuhun minidu' pogun, miilkau zioho' id hisiu. Vookon mingkakat.

Kivaa timpu dioho' do miboos, sopikoko-koko do mongiak ontok kalamazan. Okodoit zioho' ontok kivaa tuhun nosusa'. Kikapantangan! Humingkozod o mohoing tondu. Om moginggat nodii zioho mantad tinggaton ii poinsuang do salapa'. Vookon kusai nga' humingkozod nogi. Vookon pisolidangon o takod do miikau.

Doiho no zioho' do mogiboboos. Songian kivaa di moboos, ii suvai mokinongou. Au' zioho' aanangan do kivaa sumampalag. Aiso adat, ka dioho'.

Nung au' miikau songian mogibooboos, au' otohinaasan nunu ii booson. Songian au' alatian, ginavo humodong, toi' au' koiho nunu maan toinao'. Okudi' kosivatan do minsingiho.

Aiso taanu songian do tumimung songovian om au' i' mogibooboos toi mokinongou. Nunu dii guno do tumimung toomod om toiso'iso' mimang nunu ii kaandak sondii.

Baino, nokobuu' nodii kozo o pomogunan. Kopiboos sundung do miinsodu'. Tuutulus okito gambal sabap kivaa 'camera' id telefon om ii kaanu papaatod dii kumaa doid telefon tiso' sundung potuu do huu' sampaping do pomogunan. Ta', avasi' kozo. Monguhan iti do kopooposizon do tuhun!

Nga' ii podii kosusaan tu' songian do miikau sabap do kivaa pibaasan toi' sabap mindad takanon do posuungon, okudi' kozo ii miboos. Nunu ii maan kogumuan do tuhun baino nga' papahabus do telefon"tapandai" dioho' om mintodos dii. Ingkaa no puu paganakan. Ingkaa nogi' ii miambahut.

Natagak sunduvan do pizunguan. Natagak kahangadan do miboos. Om miampai dii, tumagak piombohutan om pilotian om piobpinaizan.

Avasi' do kivaa do bakaang ngaavi' do miaga diti. Kosokodung iti! Nga' songian do katahib do momoguno dii, akagasan o tuhun do ula-ula ii kopogovit kumaa koutuman. Adadi' zioho' do suupu dii bakaang. Adadi ii bakaang do ponokinoingan.

Songian do au' kaanu momoguno dii toi' aiso dii do piovit-ovit, miaga ko' atagakan o tuhun dii do hongon toi' takod. Mingkolomusos isido. Au' otoonong pomusaavan!

Iti no nangku vaza' do kobuuon? Nung ingkaa, nunu dii guno do oindamaan do mimang buu' nung au' no kaanu tuhun momoguno bakaang ngaavi' kavavagu miampai do kotunud? Nunu dii guno ngaavi diti nung mamadadi iti do tuhun sabaagi do tudipon?